Kreu i Partisë Demokratike, Lulzim Basha ka një tjetër thirrje për shqiptarët, referuar protestës së sotme të opozitës së bashkuar.
Vetëm dy orë para protestës, Basha ka publikuar një video, ku sulmon qeverinë, ndërsa shkruan se bashkimi është e vetmja shpresë për shqiptarët që duan një vend normal.
“Protesta, përballja, bashkimi kundër padrejtësisë është e vetmja shpresë për shumicën e shqiptarëve që duan një vend normal, ku qeveria të punojë për ta e jo për krimin. Sonte në ora 19.00 të bashkohemi si asnjëherë me njëri-tjetrin në protestën kombëtare, për t’i treguar kryeministrit ilegjitim të avdylajve, se populli ia ka hequr vizën. Asnjë hap pas! #ShqipëriasiEuropa”, shkruan kryedemokrati në postimin e tij.
Kujtojmë se sot opozita e bashkuar do të mbajë protestën e tetë kombëtare, ku kërkon largimin e Ramës, krijimin e një qeverie tranzitore dhe mbajtjen e zgjedhjeve të parakohshme.
Protesta e radhës e opozitës, vjen pas publikimit të përgjimeve të Astrit Avdylajt, mes tjerash edhe me kryebashkiakun e Durrësit, Vangjush Dako, për blerjen e votave për PS-në, në zgjedhjet e 2017-ës.
