Uinston Çërçill, cilësohet një hero në Britaninë e Madhe dhe në botë, për shkak të udhëheqjes së aleatëve në fitoren e Luftës së Dytë Botërore. Por për të tjerët, ai është përgjegjës për vdekjen e të paktën 3 milionë indianëve nga uria në vitet 1940. Në një libër të botuar vitet e fundit, historiania indiane Madhusree Mukerjee, pretendon se Çërçilli nxiti dhe lejoi një uri masive në mesin e indianëve në rajonin e Bengalit në vitin 1943.
Zyrtarët anglezë, larguan pjesën më të madhe të anijeve nga zona, nga frika e rënies në duart e japonezëve. Për pasojë miliona indianë, nuk mund të furnizoheshin me ushqimin kryesor që kishin, orizin. SHBA-ja dhe Australia, u ofruan të ndihmonin në shmangien e një katastrofe humanitare. Por kryeministri britanik, nuk pranonte t’u jepte anije për transport, pasi sipas tij ato duheshin më shumë për luftën. Ai refuzoi ndihmën, edhe kur amerikanët u zotuan të çonin me anijet e tyre drithin amerikan për popullatën vendase. Sipas Mukerjee, kjo ishte një qasje e qëllimshme e Çërçillit, që ishte racist, dhe i urrente për vdekje indianët. Kjo sepse ai e ndjente që pas luftës, India do të shkëputej nga Britania. Edhe sekretari i shtetit për Indinë, Leo Ameri, i tha një moment Çërçillit, se qasja e tij mbi atë rast, nuk ishte shumë e ndryshme nga ajo e Adolf Hitlerit.
