Deputeti demokrat Ervin Salianji, ka ngritur shqetësimin e vrasjeve pa autor në Komisionin e Sigurisë. Drejtori i Policisë së Shtetit, Gledis Nano, i është përgjigjur deputetit të PD-së Ervin Salianji në lidhje me ngjarjet pa autor, ku pohoi se ka raste specifike që janë të vështira për tu zbardhur. Duke iu referuar statistikave, Salianji tha se nga viti 2014, janë 120 vrasje pa autorë. Deputeti shprehu haptazi shqetësimin, se ngjarjet tipike mafioze jo vetëm që nuk parandalohen, po as edhe nuk zbulohen. Në kundërpërgjigje, Gledis Nano ia ktheu se angazhimi është maksinal, por për këto krime duhet kohë.
Ervin Salianji: Nga 2014 janë 120 vrasje pa autorë. Ngjarjet tipike mafioze jo vetëm që nuk parandalohen, po as edhe nuk zbulohen. Ka ekzekutime me snajper, që nuk janë zbardhur. Ka ndonjë informacion në lidhje me këto ngjarje? A ka sofistikim të grupeve kriminale?
Gledis Nano: Ngjarjet pa autorë që përmendi deputeti Salianji, ka raste të veçanta specifike dhe të caktuara që janë të vështira për t’u zbardhur. Kanë ndodhur edhe në vende të tjera shumë më të zhvilluara.
Për zbardhjen e ngjarjeve që ju përmendët; duan kohë. Por të jeni të sigurt që angazhimi është maksimal, dhe nuk pushojmë në asnjë moment për zbardhjen e tyre. Dua të sqaroj një tjetër moment. Kur flasim për vrasje, puna është e fshehtë dhe një pjesë e punës është e padukshme, kur kemi të bëjmë me parandalim të ngjarjeve sidomos.
Një pjesë bëhen publike dhe një pjesë nuk bëhen për shkak të hetimeve. Për këtë arsye duhet të jemi të qartë që angazhimi është maksimal. Në lidhje me ngjarjet e fundit, ka hetime që do të japin shumë shpejt rezultate”.
