Sipas Organizatës Botërore të Shëndetësisë, në botë ka 1.1 miliardë duhanpirës. Ky numër pritet të mbërrijë 1.6 miliardë deri në vitin 2025. Duhani vret më shumë se 6 milionë njerëz çdo vit, ose 1 përson në çdo 5 sekonda. Pirja e duhanit, shkurton mesatarisht me 13 vite jetën e një njeriu.
Duhani nuk rrezikon t’ju shkaktojë vetëm kancer në mushkëri, por edhe në prostatë, qafën e mitrës, zorrën e trashë, ezofag, veshka, laring, mëlçi, gojë, pankreas, rektum dhe stomak.
Përveç kancerit, pirja e duhanit mund të rrisë me 200-400 për qind rrezikun e sëmundjeve koronare të zemrës, dhe goditjeve në tru.
Kina ka mbi 300 milionë duhanpirës, që konsumojnë gati 1.7 trilionë cigare çdo vit, ose 3 milionë cigare në minutë.
Një cigare përmban 8-9 miligram nikotinë. Sipas një studimi në 5 cigare ka mjaftueshëm nikotinë për të vrarë një të rritur nëse hyn i gjithi në trup. Shumica e duhanpirësve marrin mesatarisht 1-2 mg nikotinë për 1 cigare, prej të cilave 0.03 miligramë thithet nga gjaku.
Tymi i duhanit përmban më shumë se 4.000 kimikate, prej të cilave më shumë se 250 janë të njohura si të dëmshme, dhe më shumë se 50 njihet se shkaktojnë tumore.
Nga 6 milionë të vdekur nga duhani, 890.000 nuk janë duhanpirës, por konsumues të tymit që gjendet në ambjentet ku pihet duhan.
Vetëm në SHBA, duhani shkakton një dëm ekonomik prej 300 miliardë dollarësh çdo vit.
Përdorimi i duhanit, ka marrë më shumë se 100 milion jetë njerëzish gjatë shekullit XX-të. Nëse nuk ka përpjekje serioze për të reduktuar konsumin e tij, pritet që gjatë këtij shekulli të vdesin mbi 1 miliardë njerëz.
OBSH, ka arritur në përfundimin se gjysma e të gjithë duhanpirësve, do të vdesin si rezultat i përdorimit të duhanit.
TIRANA TODAY
