Dëshmi tronditëse vijnë për ngjarjen në Kombinat, ndërsa fqinjët tregojnë se kryefamiljarja i kishte larguar të gjithë. Zhaneta Josifi, 56 vjeçe dhe vajza Anisa Josifi, 30 vjeçe, kanë ndërruar jetë duke u vetëflijuar, ndërsa Blerta Josifi u dërgua në gjendje të rëndë shëndetësore në spital.
Dyshohet se vajza ka ndërruar jetë të paktën një vit më parë, ndërsa nëna dhe motra tjetër i lyenin trupin me vaj ulliri dhe uthull për të ngadalësuar procesin e dekompozimit, duke pritur kështu ringjalljen e saj.
Një ndër fqinjët tha për “ABC News” se Zhaneta Josifi bashkë me vajzat, kishte dy vjet që nuk dilte nga shtëpia, madje edhe dyert e dritaret i mbante mbyllur. Ajo e kishte pyetur për të ndjerën, Anisën, por e ëma i kishte thënë fqinjes se kishte shkuar diku. Madje fqinja kujton edhe një situatë të sikletshme, kur para një muaji kishte trokitur në portën e tyre, por e zonja e shtëpisë i kishte kërkuar që të mos e shqetësonte më. Një tjetër komshie ka rrëfyer se Zhaneta ishte zënë me tërë familjarët e saj.
Dëshmia e fqinjëve:
Fqinja 1: Unë isha në Greqi, dhe kur erdha hyra tek shtëpia dhe e pyeta Zhanetën, ku e ke Anisën? Ka vajtur në një vend më tha. Pas dy ditësh shkova prapë, i kërkova sitën për pak miell që kisha marrë. Prapë e pyeta për Anisën se mos kishte ikur në Gjermani, por më tha që jo, do vij koha që do e shikosh dhe vuri buzën në gaz. Ato vajza kishin 2 vjet pa dalë fare. E ëma ka punuar në një familje, ndërsa vajzat kanë punuar më përpara, por pastaj u mbyll puna, dhe nuk punuan më. Ishin të dobëta me fizik, jo shumë të shkathëta. Përpara 1 muaji i rashë derës së Zhanetës. Ajo më tha që zhduku, mos ta shoh bojën.
Fqinja 2: Jemi interesuar, kemi dalë kemi parë dyer e penxhere, pa rroba pa asgjë. Ne që kemi hyrë e kemi dalë me to, filluam të kemi siklet. Ajo nuk bënte asnjë nga njerëzit e saj, i kishte larguar të gjithë, ishte zënë. Punët e tyre se pse. Parmbrëmë paska marrë i vëllai në telefon dhe nuk është përgjigjur njeri. Unë kisha 2 vjet pa i parë. Vetëm kur i prunë ndihma që hapi pak derën, i pashë pak fytyrën në cep të derës dhe i fola dhe nuk i kam parë më. Nuk di çfarë të them më….
