Fillimisht zgjedhja e tij ishte kuqezi, por më pas gjithçka ndryshoi dhe Fiorin Durmisha zgjodhi të përfaqësojë fanellën e Greqisë në rang kombëtaresh. Për herë të parë në karrierë sulmuesi shqiptar u grumbullua nga skuadra helene edhe pse nuk arriti të bënte debutimin në përballjen me Bosnje-Hercegovinën.
Pavarësisht mungesës së debutimit, grekët janë të bindur se Durmishaj ka hedhur hapin e madh në karrierë dhe me zgjedhjen e Greqisë, ka siguruar karrierën e tij dhe familjen. Një nga gazetat prestigjioze greke, i ka kushtuar një artikull sulmuesit grek për të cilin shprehen se tashmë duhet të gjejnë nj klub të madh, ku përveç Olimpiakosit që i ka siguruar thuajse shërbimet e tij, në pah kanë dalë edhe emra të tjerë.
Lech Poznani është një nga skuadrat të cilat kanë shfaqur interes të vazhdueshëm për Durmishajn, por emri i polakëve ka dalë vetëm pasi Durmishaj vendosi të luante për Greqinë.
“Durmishaj ndoshta nuk debutoi ndaj Bosnjës, por tashmë ka siguruar jetën e tij dhe karrierën e tij profesioniste. Ai do të largohet shumë shpejt për një klub më të madh dhe përveç Olimpiakosit ka të tjera ekipe elitare që e kërkojnë. Durmishaj kërkohet edhe në Poloni nga Lech Poznan, por do të jetë Olimpiakosi ai që do të thotë fjalën e fundit”, shkruajnë grekët.
Ndërkohë shumë sportdashës shqiptarë kanë menduar se Durmishaj nuk ishte i grumbulluar në sfidën e Greqisë me Bosnjë Hercegovinës, pasi grekët e kanë transformuar atë dhe në fanellë do të shkruhet “Ntourmisai”.
