Kreu i Qeverisë Edi Rama përgjatë një komunikimi me gazetarët komentoi arritjen e marrëveshjes për Reformën Zgjedhore.
Kryeministri theksoi se marrëveshja e arritur mes palëve nuk reformon asgjë nga sistemi i administrimit të zgjedhjeve.
“E vetmja kënaqësi që kam marrë nga marrëveshja është kënaqësia e Lulit pasi nuk reformon asgjë në sistemin e administrimit, por qëllimi ishte që të mos shkonim përpara vetëm, por të bashkohemi ne me gjithë botën për ta lehtësuar Lulzim Bashën dhe të tjerët nga frika e zgjedhjeve dhe për t’i thënë si e do ti që të mos kemi llafe.
Unë e di që do kemi prapë llafe se ne prapë do fitojmë. E bëmë këtë si një mesazh paqeje dhe dakordimi”, tha Rama.
Ky i fundit komentoi gjithashtu deklaratat e opozitës parlamentare, e cila ka kërkuar takim me të pasi nuk është dakord të votojë reformën në parlament:
“Do të dëgjojmë dhe do të jemi konstruktivë. Besoj që është e mirë që të gjithë të kalojmë në një stad tjetër maturimi.
Nuk kemi pse bëjmë marrëveshje për të ndenjur kështu si jemi nëpër ambasada.
Këtu dëgjova që forca më e madhe e vendit s’paska të drejtë të propozoka asgjë, por të shpërndajë karamele, llokume dhe mish nga trupi i saj.
Kur flisni për deputetët në parlament ata janë të Lulzim Bashës dhe Monika Kryemadhit, kush i sheh se janë shfaqur nga rrugë të tjera ose nga materniteti i Taulant Ballës harron se ata janë aty të zgjedhur nga Lulzim Basha dhe Monika Kryemadhi.
Kur flasim për listat e hapura, e di që shumica e shqiptarëve besojnë se janë një instrument çudibërës, nëse do të ishin të hapura ata deputetë ishin pjesë e listës dhe nuk do të votohej vetëm për partinë, por edhe brenda tyre.
Jemi këtu për ta mbyllur në mënyrë dinjitoze, jo duke u futur në historira kap njërin, e kap tjetrin sepse nuk ka vlerë të dalësh në rrugë dhe të bësh konsensus dhe të ikësh në parlament dhe të dalësh me shpatë”.
