Kryeministri Rama ka gënjyer haptazi për paketën e tretë ekonomike. Me mjaft mjeshtëri, ai ka hedhur poshtë çfarë ka premtuar më herët për qytetarët shqiptarë, të cilët kapitulluan si pasojë e COVID-19. I pyetur nga gazetari Blendi Fevziu në emisionin “Opinion”, kreu i qeverisë tha se po keq-citohej. Sipas Ramës, nuk është aspak e nevojshme një paketë e tretë, në kohën kur shqiptarët i janë rikthyer normalitetit.
Diskutimi në emision:
Blendi Fevziu: Në fund të prillit thatë që do të përgatisni paketën e tretë, shumë të madhe, për t’i dhënë frymë ekonomisë së goditur nga COVID.
Edi Rama: Jo, jo, po më citoni gabim. Kjo s’është ashtu. Jo, jo, jo, nuk e kam thënë. Në emisionin tuaj gërmoni dhe kam thënë “nëse do të jetë nevoja, do të ketë edhe një paketë të tretë, edhe të katërt”. Në varësi të dinamikës, çfarë pakete të tretë do të kemi tani që të gjithë i janë rikthyer procesit të punës?!
Nëse kthehemi pas në kohë, nga mesi i muajit prill, Rama paralajmëroi edhe një paketë të tretë mes 20- 25 majit, duke parë ecurinë në luftën kundër COVID-19.
Ja se çfarë ka thënë ai në datën 13 prill 2020:
”Paketa e parë na ndihmoi në zbutjen e dhmbjeve të atyre që u prekën menjëherë. Ato që u mbyllën me urdhër të qeverisë bizneset, dyqane dhe pensionistët. Ndihma ekonomike u dyfishua. Atyre të biznesit të vogël ju akordua një ndihmë. Pensionistëve ju rrit pensioni. Mbështetja nuk do të mbaronte aty. Mbasi kemi ndjekur me vëmendje dinamikën në luftën për jetën edhe ekonomisë, tani është momenti ta zgjerojmë. Plot të tjerë janë goditur drejtpërdrejt dhe me të drejtë kërkojnë dhe meritojnë ndihmë.
Goditjet kanë qenë valë-valë, por kjo paketë e zgjeruar do të mbështesë plot 176 mijë të tjerë individë dhe familje. Të cilët e thashë, nuk janë goditur të njëjtën kohë dhe nuk i përkasin të njëjtën kategori. Por do i japim mjetin financiar për t’ja lehtësuar 40 ditëshin vendimtar deri në fund të majit.
Pse deri në fund të majit? Sepse mendojmë se duke mbajtur fort zinxhirin e solidaritetit, do të ulim kurbën dhe do lëvizim jashtë perimetrit duke mundësuar kthimin në punë në kushte strikte.
Ata që do përfitojnë nga kjo paketë. Ne jemi gati për paketën e tretë mes datave 20- 25 maj duke parë dinamikën, dhe do jemi në gjendje t’i gjejmë mundësitë t’i jemi në mbështetje atyre që nuk kanë mundësi të dalin nga perimetri. Pra të rezistojnë pa makthin e zbrazjes së plotë të arkës së familjes”, tha Rama.
Është ish-kryeministri Berisha i cili nxjerr me zë dhe figurë atë që mohoi Rama në emisionin “Opinion”.
Bashkëngjitur videos ai shkruan: “Dëgjojeni njeriun që në çdo fjalë, një gënjeshtër nxjerr!”.
