Presidenti i Kosovës, Hashim Thaçi i është bashkuar thirrjes së kryeministrit Rama për Luginën e Preshevës.
Përmes një postimi në Facebook, Thaçi i bën thirrje shqiptarëve në këtë zonë që të votojnë listën e unifikuar shqiptare.
Partitë shqiptare në Luginën e Preshevës janë bashkuar me një listë dhe Thaçi kërkon nga shqiptarët ta votojnë masivisht. Sipas tij, vetëm në këtë mënyrë zëri i shqiptarëve të Luginës së Preshevës mund të dëgjohet kudo.
Postimi i plotë:
Jam i lumtur që i gjithë spektri politik shqiptar në Luginën e Preshevës është bashkuar dhe në procesin zgjedhor atje po garojnë me Listën e Përbashkët të Shqiptarëve.
Të gjithë bashkëkombësve shqiptarë në komunën e Preshevës, Bujanocit dhe Medvegjës u bëj thirrje që të dalin masivisht në zgjedhjet e nesërme dhe të votojnë për platformën e unifikuar politike të partive shqiptare.
Duke qëndruar të bashkuar në mbrojtjen e të drejtave dhe lirive kombëtare, zëri i shqiptarëve në Luginën e Preshevës do të dëgjohet kudo. Me vetëdije të lartë kombëtare dhe të bashkuar në përgjegjësi politike e forcojmë më shumë edhe kombin tonë. HTH
