Ditën e sotme iu dha lamtumira e fundit studiuesit dhe shkrimtarit, Moikom Zeqo, i cili humbi jetën 5 ditë më parë nga një sëmundje e rëndë.
I pranishëm në homazhet e tij në Muzeun Historik Kombëtar ishte edhe i biri, Epidami, i kthyer nga Amerika.
Ai iu drejtua gazetarëve të pranishëm me lot në sy duke iu thënë: “Ju njihnit një Moikom tjetër, nuk e njihnit babin tim…”
Djali i tij tha se amaneti i Zeqos nuk është përmbushur, pasi amaneti i tij i vërtetë ishte për të pasur një Shqipëri më të mirë. Epidami theksoi se i ati ka luftuar gjithë jetën për ta pasuruar kulturën e Shqipërisë.
“Amaneti i babit nuk është përmbushur, babi kërkonte një Shqipëri më të mirë. Shqipëria e babit është një Shqipëri që ndoshta e kishim dhe nuk e kemi pasur asnjëherë dhe do të ishte mirë ta kishim një ditë dhe babi, Moikomi, luftoi gjithë jetën ta pasuronte kulturalisht Shqipërinë. Amaneti i tij nuk ishte varrimi i tij, realiteti, ishte sot, jo nesër, ishte Shqipëria, por edhe njerëzimi. Unë nuk ndihem mirë, jam i lumtur që është një figurë që bashkon politika, familje dhe nuk ndan, por është një ditë zie. Unë njihja Moikomin që ju nuk e njohët dot, ju njihni një Moikom tjetër”, tha ai.
Moikom Zeqo u nda nga jeta në moshën 71-vjeçare, pasi humbi betejën me një sëmundje të rëndë, nga e cila vuante prej kohësh.
