“Vendi po shkon drejt një përplasje të sigurt. Se çfarë do të jetë të shohim”, këtë deklaratë të fortë e ka bërë ish-kryeministri Berisha në një intervistë në ABC News kur u pyet nëse do të ketë përplasje civile në zgjedhjet e 30 qershorit.
“Vota e lirë, është vota e lirë. Që kur kombet kanë sakrifikuar për këtë, është e vlefshme. Fasadë nuk mund të jemi. Opozita e ka këtë betejë me çdo çmim për të rikthyer votën e lirë. Pasojat e regjimit të Edi Ramës, janë identike me pasojat e epidemive dhe kolerës në Haiti. A e dini që Shqipëria renditet e katërta në botë për numrin e njerëzve që duna të largohen. Shqipëria nuk ka as ebola dhe as epidemi. 400 mijë shqiptarët e larguar në 4 vite”, u shpreh ai.
“Për herë të parë në historinë e një vendi që pretendon të jetë i lirë ka një opozitë që jeton në kushtet e një grushti shteti brenda shtetit. PD është në një betejë për jetë a vdekje me armikun më të rrezikshëm të kushtetutshmërisë dhe ligjit që është Edi Rama.
Në 30 qershor nuk ka zgjedhje. Opozita që sot ndihet në çdo qelizë të vendit shumicë do t’ju tregojë këtyre që sillen gangsterë në çdo gjë se si është vota e lirë. Opozita ka popullin dhe të drejtën dhe fuqinë e tyre ata janë drogën dhe gangsterët.
Si mund të hyjmë në zgjedhje? Pa Edi Ramën, zbardhje e plotë e dosjeve 339 dhe 184 dhe adresim të ndryshimeve në ligj. Duhet të ikë me çdo kusht Edi Rama dhe infrastruktura kriminale që manipulon zgjedhjet. Vendi po shkon drejt përplasjes civile. E sigurt”.
“Rrezikojmë një “97” të dytë?” – e pyeti gazetarja Mirela Milori. “Se çfarë do të jetë do ta shohim. Vendi po shkon drejt një sakrifice” – tha Berisha.
Berisha tha se duhet të ikë me çdo kusht Edi Rama për të realizuar zgjedhje të lira. “Sipas një informacioni të SHISH, 125 komisarë dhe nënkomisarë u morën me parcelat e kanabisit. Duhet të ikë me çdo kusht Edi Rama, duhet të ikë me çdo kusht infrastruktura kriminale dhe të zhvillohen zgjedhjet në qoftë se shqiptarët duan të votojnë lirisht”, shtoi Berisha.
