Konstitucionalisti Shkëlqim Hajdari ka folur mbi zgjedhjet e ardhshme parlamentare, duke thënë se ato do të nxjerrin në pah një problem të madh.
I ftuar në studion e News24, Hajdari tha se gjysma e votuesve shqiptarë të cilët janë jashtë shtetit, nuk do kenë mundësi sërish të votojnë.
Sidoqoftë, Hajdari shprehet besimplotë se në zgjedhjet e ardhshme lokale apo parlamentare, votimi i emigrantëve shqiptarë do të jetë një çështje e zgjidhur.
“Populli shqiptar është vital. Ky popull të shikon në dritë të syrit dhe reagon në momentin kur arrin ‘aty ku nuk mban më’. Listat do hapen sepse desh publiku shqiptar, i cili gjeti shtigje që zërin e vet ta çonte aty ku sot po diskutohen për t’u hapur listat. Sigurisht, publiku shqiptar është i qartë, kërkon një reformë akoma më të thellë demokratike në Shqipëri. Në mënyrë që lidershipi politik të mos jetë kaq i fortë, i cili të diktojë në maksimum jetën politike brenda forcës së vet politike dhe nesër në mazhorancë. Jam i bindur se të gjithë ata që kanë kërkuar ringritjen e demokracisë në Shqipëri, janë në të drejtën e tyre për të shpresuar që këto zgjedhje do të nxjerrin problematika të tjera. Jam i bindur se këta do të nxjerrin problematikën e madhe, të jashtëzakonshme, që nuk mendoj se do ta zgjidhin dot. Domethënë pjesëmarrjen e shqiptarëve në zgjedhje, pasi gati gjysma e votuesve shqiptarë është jashtë shtetit. Unë dëshiroj shumë që atyre t’i krijohet mundësia të votojnë, por siç duken punët, vështirë do ta kenë. Por në zgjedhjet e ardhshme, qofshin ato lokale ose parlamentare, nuk ka për të pasur politikan në Shqipëri që të sabotojë votimin e njerëzve tanë që janë jashtë shtetit”, tha ai.
