Presidenti i Serbisë, Aleksandër Vuçiç shpalli 26 prillin e këtij viti datë të zgjedhjeve të përgjithshme, që shihen si shumë të rëndësishme për forcimin e pushtetit të Partisë së tij Përparimtare.
“Të gjithë pjesëmarrësve u dëshiroj sukses dhe një mjedis demokratik në ditën e votimeve”, tha ai pasi nënshkroi dekretin për shpalljen e zgjedhjeve.
Pjesa më e madhe e partive opozitare në Serbi kanë vendosur të bojkotojnë zgjedhjet, duke akuzuar presidentin serb për sundim autokratik, shkelje të lirisë së medies, sulme ndaj veprimtarëve të opozitës, korrupsion dhe lidhje me krimin e organizuar.
Presidenti serb dhe mbështetësit e tij që mbanin shumicën në parlamentin me 250 vende, i kanë mohuar vazhdimisht pohimet e tilla. /Rel
