Tashmë është hedhur dritë mbi skenarin e protestës mbarëkombëtare të paralajmëruar nga opozita, e cila do të zhvillohet në datën 13 prill. Protesta do të startojë në orën 18:00, dhe do të ketë të njëjtin skenar si në protestat e mëparshme.
Kreu i PD-së, Lulzim Basha, gjatë mbledhjes së Kryesisë ka kërkuar që për protestën e 13 prillit, të ketë organizim dhe pjesëmarrje më të madhe se protestat e tjera.
“Për protestën e 13 Prillit, duhet një organizim kapilar për ta pasur pjesëmarrjen edhe më të madhe se dy protestat e tjera kombëtare. Kemi të gjithë situatën në favor. Ne jemi de fakto shumicë. Që pas djegies së mandateve, PD ka një rritje të menjëhershme edhe mes të pavendosurve.
Jemi shumicë absolute në çdo sondazh të pavarur vendas dhe të huaj. Duhet ta përkthejmë sa më shpejt në votë këtë mbështetje të shqiptarëve. Për këtë arsye, pjesëmarrja e lartë në protestë ka një rëndësi të jashtëzakonshme”.
Protestuesit fillimisht do të vendosen para Kryeministrisë, dhe më pas do të ketë një rrethim simbolik të gjithë godinës. Opozita ka paralajmëruar se nuk do t’i ndalojë protestat, deri në rrëzimin e qeverisë Rama.
