Teksa kriza politike ka lëshuar rrënjë, Basha po sheh alternativat e radhës për gjetjen e një zgjidhje. Një ditë më parë, në zyrën e Presidentit ka shkuar kryetari i Partisë Demokratike, Lulzim Basha, i cili ka zhvilluar një takim kokë më kokë me kreun e shtetit, bëjnë me dije burime për ‘Panorama’.
Biseda mes palëve ka qenë tepër konfidenciale, ndërsa janë kujdesur për ta mbajtur takimin e tyre larg vëmendjes së medias. Mësohet se pjesë e diskutimit ka qenë kriza politike, si edhe djegia e mandateve nga ana e opozitës.
Më herët, Presidenti Ilir Meta është shprehur se është i gatshëm të lë mandatin, duke bërë një paralelizëm të sakrificës së tij në këtë rast ngjashëm me Salvador Allende. Referuar situatës politike ku ndodhet vendi, Meta vendosi pikat mbi ‘i’, duke nënvizuar se vendi po kalon një krizë, e cila nuk zgjidhet as me retorikë dhe as me metoda policore.
“Jam i gatshëm për të dyja ekstremet. Që nga dorëzimi i mandatit tim si President, pasi të sigurohem që vendi ka një zgjidhje politike parimore, kushtetuese, solide që e çon përpara, e deri tek sakrifikimi i jetës sime si Salvador Allende, për të ndaluar instalimin e një junte që mund ta kthente Shqipërinë 30 vite pas”.
