Në sajë të operacionit të koduar “Fundviti”, policia e Sarandës ka zbardhur vjedhjen e një shume të konsiderueshme parash në një supermarket më 11 dhjetor. Dy grabitësit janë vënë në pranga.
Njëri prej tyre është 37-vjeçari me inicialet B.C., nga Saranda, i cili ka punuar si teknik i kamerave të sigurisë në këtë supermarket. Nëpërmjet telefonit, ai kishte hyrë në sistemin e kamerave dhe kontrollonte shumën e parave që ndodheshin brenda supermarketit.
Personi i dytë që ra në pranga është shtetasi E.D. (Gj.) 40-vjeç nga Talja e Lezhës, i dënuar më parë në Itali për vjedhje dhe sulm ndaj forcave të policisë.
Gjatë finalizimit të aksionit të koduar “Fundviti”, uniformat blu gjetën dhe sekuestruan 4 milionë lekë të reja, 2500 dollarë, 1000 paund, 2 makina me të cilat u larguan autorët, 4 celularë, 3 pajisje DVR dhe 2 laptopë.
Materialet hetimore i kaluan Prokurorisë pranë Gjykatës së Shkallës së Parë Sarandë, për veprime të mëtejshme, për veprën penale “Vjedhja” kryer në bashkëpunim.