Amerikanët janë përgatitur për skenarë të fortë dhune gjatë ditëve në vijim. Opozita më 25 maj do të zhvillojë protestën e radhës, ndërsa deputetët e PD dhe LSI në çdo media flasin për përplasje civile, tensione dhe kaos deri më 30 qershor. Por informacione për skenarë destabilizues ka marrë dhe ambasada amerikane, e cila ka nisur lëvizjet për të mos lejuar asnjë dëmtim të qytetarëve të saj. Gazeta ka siguruar një e-mail që ambasada amerikane u ka nisur të gjithë shtetasve amerikanë në vendin tonë, ku i informon mbi atë se çfarë pritet që të ndodhë në ditët e javët në vijim.
Në mesazhin e ambasadës, tregohet qartë se po planifikohen skenarë dhune dhe kjo ka filluar të shqetësojë dhe ndërkombëtarët, pasi si duket, siguria e tyre është në rrezik. “Duhet të shmangen: Ndërtesa e Parlamentit, Kryeministria ndërtesa të tjera qeveritare, rrugët kryesore në të gjithë vendin. Demonstrata të përsëritura pritet të ndodhin në të gjithë Shqipërinë për një periudhë të pacaktuar kohore, me mundësinë që të bëhen të dhunshme. Datat e sakta dhe kohëzgjatja e këtyre demonstratave janë të panjohura. Demonstrimet e kohëve të fundit kanë përfshirë dhunën, disa demonstrues kanë përdorur pajisje shpërthyese dhe molotov. Forcat e sigurisë janë përgjigjur me ujë dhe gaz lotsjellës për të shpërndarë turmat. Personeli i ambasadës së SHBA-së ju drejtohet që të shmangni të gjitha pikat e grumbullimit dhe vendet ku demonstratat janë të pashmangshme ose të vazhdueshme. Shmangni grumbullimet e mëdha dhe vendet ku demonstratat janë të pashmangshme ose në vazhdimësi”, thuhet në mesazhin e ambasadës.
Sa herë kishte protesta, ambasada lajmëronte qytetarët e saj, 1 ose 2 ditë para, por këtë herë është ndryshe. Ajo i ka informuar me e-mail të gjithë, duke kërkuar që të jenë vigjilentë gjatë gjithë ditëve në vijim dhe shprehet hapur se do ketë dhunë. Kjo tregon qartë se SHBA ka marrë sinjal se dyshja Berisha-Kryemadhi janë gati të djegin vendin për të ardhur në pushtet.
PD-LSI në luftë me SHBA
Ditët e fundit po jepen sinjale të qarta se Partia Demokratike dhe LSI po hyjnë në luftë me amerikanët. Ambasada e SHBA ka reaguar shpesh dhe në deklarimet që ka bërë, ka qenë shumë kritike mbi mënyrën se si po veprojnë PD e LSI. Reagimi më i fortë erdhi pas protestës së të shtunës, ku ambasada ju drejtua në emër Bashës e Kryemadhit, duke ju kërkuar të dënojnë dhunën dhe të tërhiqen nga skenarët destabilizues.
“Ne dënojmë dhunën e pranishme gjatë protestave të 11 majit në Tiranë dhe përgjegjësit e saj. Dhuna çoi në plagosje dhe dëmtime të pronës, përfshirë edhe dëmtim të vendbanimit së ambasadorit të OSBE-së. Këto veprime të dhunshme ishin të paligjshme dhe jodemokratike. Ne iu bëjmë thirrje udhëheqësve të opozitës, veçanërisht kryetarit të Partisë Demokratike, Lulzim Basha dhe kryetares së Lëvizjes Socialiste për Integrim, Monika Kryemadhi, që të dënojnë publikisht veprimet e dhunshme të mbështetësve të tyre, të bashkëpunojnë me çdo hetim që synon të identifikojë çdo person që i kreu ato dhe vënien e tyre përpara përgjegjësisë, si dhe të sigurojnë që të gjitha protestat e ardhshme publike të jenë të qeta dhe paqësore”, tha ambasada. Po ashtu, amerikanët kanë dalë kundër djegies së mandateve dhe po mbështesin opozitën e re të krijuar në Parlament. Kjo tregon qartë se PD e LSI janë në monitorim nga amerikanët dhe çdo skenar destabilizues rrezikon që marrëdhëniet e tyre me Uashingtonin të tensionohen. /Gazeta SOT
Pse rrogat rriten në letra, por varfëria rritet në realitet?
