Ministria e Jashtme e Greqisë, ka reaguar për here të pare në lidhje me deklaratën e Presidentit të Serbisë Aleksandër Vuçiç, i cili disa ditë më pare i kërkoi Athinës zyrtare që të mos njohë pavarësinë e Kosovës.
Përmes një deklarate për Gazetën Express, është bërë e ditur se pozicioni i Greqisë për pavarësinë e Kosovës mbetet i pandryshueshëm, pra nuk do të ketë njohje të pavarësisë.
Më tej, thuhet se vendi Helen po bashkëpunon me Kosovën në fusha të ndryshme, por pa i përfshirë aspektet e lidhua me statusin e vendit.
“Siç e dini, Greqia nuk e njeh Kosovën dhe pozicioni i saj mbetet i pandryshueshëm. “Njëkohësisht, është po aq e ditur se Greqia ka ndjekur një qasje konstruktive ndaj Prishtinës, duke qenë vend pritës i një “Zyre të Tregtisë dhe Çështjeve Ekonomike të Kosovës në Athinë” që nga viti 2019 dhe punon me Kosovën për shtimin e bashkëpunimit në fusha të ndryshme. Në këtë frymë, me qëllim të avancimit të mëtejmë të bashkëpunimit tonë dypalësh dhe lehtësimit të funksionimit të Zyrës, pa i përfshirë aspektet e lidhura me statusin, kjo zyrë është riemërtuar “Zyra e Interesave të Kosovës në Athinë”.
Ministri i Punëve të Jashtme i Greqisë, z.Dendias, bëri një vizitë në Prishtinë tetorin e kaluar, duke i dhënë shtytje bashkëpunimit dypalësh, duke e vënë theksin në fushën ekonomike, përfshirë tregtinë dhe energjinë”, thuhet në përgjigje. Me qëllim të shtimit të mëtejmë të bashkëpunimit, ishin vendosur pikat e kontaktit, më saktësisht zëvendësministri Fragoyannis dhe homologu i tij në atë kohë, zëvendësministri Brajshori, të cilët zhvilluan një telekonferencë. Si hap vijues, Forumi i Katërt Biznesor Greqi – Kosovë u mbajt më 20 prill në mënyrë virtuale për shkak të krizës shëndetësore’’, thuhet më tej në deklaratë.
Kërkesa e Vuçiç për Greqinë, vjen pasi Beogradi ndihet i shqetësuar nga thellimi i bashkëpunimit në fushën e ekonomisë dhe tregtisë midis këtij shteti dhe Kosovësm si dhe faktit se kryediplomati grek, Nikos Dendias, pritet të realizojë në Prishtinë gjatë këtij muaji.
