Në nisjen e dialogut të tretë për çështjen e Kosovës me përfaqësuesit e Konventës Kombëtare për Bashkimin Evropian, konventë kjo që bashkon rreth 700 organizata të shoqërisë civile, presidenti i Serbisë Aleksandar Vuçiç, ka bërë një deklaratë të fortë. Ai ka thënë se është kundër ruajtjes së konfliktit të ngrirë mes palëve, ndërsa përpjekjet janë për një kompromis të mundshëm.
“Unë jam kundër ruajtjes së konfliktit të ngrirë, dhe ne po përpiqemi të bëjmë një kompromis me shqiptarët”, ka deklaruar presidenti Vuçiç.
Presidenti i Serbisë ka deklaruar po ashtu se ‘gjëja më e rëndësishme është ruajtja e paqes dhe stabilitetit në rajon’.
“Rasti i Armenisë dhe Azerbajxhanit na ka treguar se sa të rrezikshme janë të ashtuquajturat konflikte të ngrira.
Sepse një ditë, gjithçka që është e ngrirë do të shkrihet nga dikush”, është shprehur ai. Sipas tij, reagimi i bashkësisë ndërkombëtare ndaj ripërtëritjes së konfliktit në Nago-Karabak ishte i pakët, dhe se kjo mund të shërbente si një mësim për Serbinë.
“Kjo na tregon shumë mirë që kohërat në botë kanë ndryshuar, se ka interesa të veçantë më të fortë në krahasim me interesa me të vogla grupore të cilat kanë ekzistuar më herët dhe se ne e dimë shumë mirë se duhet të jemi të gatshëm për të ruajtur vendin tonë në çdo kohë,” tha Vuçiç.
