Ish-kryebashkiaku i Lushnjes, Fatos Tushe kërkon lirinë, ndërsa pretendon se është i sëmurë dhe e ka të pamundur që të qëndrojë në qeli. Fatos Tushe i arrestuar për “shpërdorim detyre” dhe “abuzim me tenderat”, i është drejtuar sërish Apelit për të kërkuar lirinë në këmbim të garancisë pasurore.
Ai me anë të avokatit të tij thotë se nuk mund të qëndrojë në qeli, pasi vuan nga disa sëmundje. Në shkresën zyrtare citohet se Tushe vuan prej vitesh nga sëmundje kardiake, diabet, gur në tëmth me kriza të vazhdueshme akute, nga mushkëria si dhe është alergjik ndaj disa ushqimeve.
“Z. Tushe vuan prej vitesh nga sëmundje kardiake, diabet, gur në tëmth me kriza të vazhdueshme akute, nga mushkëria si dhe është alergjik/intolerant ndaj disa ushqimeve. Problemet shëndetësore të tij provohen nga të dhënat e pasqyruara në dokumentet e poshtëshënuara”, thuhet në shkresë.
Pak ditë më parë, nëpërmjet avokatëve të tij mbrojtës, Tushe i është drejtuar Apelit, ku kërkon masë më të butë sigurie. Sipas tij, nuk ka prova që e implikojnë atë në abuzimin me tenderin 240 milion lekë, për rehabilitimin e kanalit vaditës. Nga hetimet e Prokurorisë së Posaçme, rezulton Fatos Tushe ka shpërdoruar detyrën në tre raste.
