Policia e Bulqizës, ka zbardhur ngjarjen e rëndë të ndodhur mbrëmjen e djeshme, ku 22-vjeçari Elidon Basha mbeti i vrarë me armë zjarri.
Uniformat blu, kanë vënë në pranga shokun e tij, 27-vjeçarin Klodian Kola me të cilin dolën për gjueti, por që ky e fundit e vrau nga pakujdesia.
Ndërkohë, është gjetur dhe sekuestruar arma e zjarrit kallashnikov, me të cilën autori i dyshuar ka plagosur për vdekje të riun.
”Si rezultat i veprimeve hetimore u bë e mundur gjetja e armës së zjarrit tip ‘Kallashnikov’, me të cilën autori nga pakujdesia plagosi me pasojë vdekjen 22- vjeçarin, ngjarje e ndodhur në vendin e quajtur Fusha e Peladhisë, në afërsi të ish Repartit Ushtarak, vend në të cilin kishin shkuar për gjueti.’’, informon policia.
Gjithashtu, u gjetën dhe u sekuestruan në cilësinë e provës materiale motomjeti me të cilin kishin lëvizur për gjueti, një armë gjahu , një kallashnikov, një pushkë sportive, një gjerdan me fishekë, një elektrik dore si dhe rrobat me njolla gjaku që autori kishte veshur në momentin e ngjarjes.
Janë proceduar penalisht prindërit e autorit të dyshuar, konkretisht shtetasit H.K., dhe M.K., pasi autori së bashku me prindërit kanë kryer veprime që pengojnë zbulimin e së vërtetës.
Ata kanë fshehur motorin me të cilin ka lëvizur i arrestuari dhe viktima, kanë fshehur robat me njolla gjaku të cilat mbante veshur autori, në momentin e ngjarjes, si dhe kanë çmontuar e pastruar armën e gjahut të cilën i arrestuari e ka patur në momentin e ngjarjes.
Materialet hetimore në ngarkim të autorit të dyshuar dhe prindërve të tij i kaluan Prokurorisë për veprime të mëtejshme për veprat penale në ngarkim të shtetasit K.K, ” Vrasja nga pakujdesia”, “Armëmbajtje pa leje”,”Prodhimi dhe mbajta pa leje e armë të gjuetisë”, “Drejtimi i mjetit në mënyrë të pa rregullt”, dhe ndaj prindërve të tij për veprën penale “Veprime që pengojnë zbardhjen e së vërtetës”.
