Një ngjarje e rëndë tronditi kryeqytetin mbrëmjen e 1 tetorit, ku 31-vjeçarja ganeze, Jawsackie Jaboah u vra nga i dashuri i saj shqiptar, Klinton Pira. Vrasja e Jawsackie Jaboah nga 31-vjeçari Klinton Pira, që më pas vrau veten, tronditi vendin.
Klintoni e priti partneren e tij, që mbërriti në aeroportin e Rinasit nga Franca dhe bashkë shkuan në një hyrje me qira ditore në Tiranë. Mili, siç njihej ndryshe vajza ganeze, kishte ardhur për t’u takuar me Klintonin, por ky i fundit i mori jetën.
Konflikti nisi në banesën e marrë me qira ditore
31-vjeçarja ganeze dhe i dashuri i saj shqiptar, Klinton Pira, janë konfliktuar në banesën që kishin marrë me qira ditore, rreth një orë para se të ndodhte ngjarja. Ky detaj është zbuluar nga dëshmitë e një çifti bashkëshortësh, në të njëjtin kat pallati.
Sherri mes dy të rinjve kishte nisur rreth orës 17:30 minuta. Fqinjët kanë deklaruar gjatë marrjes në pyetje, se kishin dëgjuar britmat e një femre, që në pamje të parë u ishin dukur si britma fëmije, për shkak të zërit të hollë.
