Rama vizitoi paraditen e sotme familjen e Klodian Rashës. Duke iu përgjigjur interesit të mediave, kryeministri tha se 25-vjeçari Klodian Rasha humbi jetën si pasojë e një përplasje aksidentale.
Përkundrejt të gjithë kritikave të ardhura në drejtim të qeverisë, Rama shtoi se i riu nuk ishte objekt i ndonjë operacioni policor, por se ka humbur jetën në kushte të një përplasje aksidentale.
“Kjo është një nga çorbat që keni bërë ju, një çorbë që ka trazuar shpirtrat e njerëzve, për shkak të, ose qëllimit të keq, ose padijes.
Nuk është akt normativ, por vendim qeverie dhe pikërisht pse qeveria nuk është gjykatë, është përdorur thjesht dhe vetëm një term juridik, teknik, për të përcaktuar arsyen e dhënies së pensionit.
Është thënë aksidentalisht nga veprimi i forcave policore. Personi që humbi jetën, nuk ka qen objekt i ndonjë misioni policor, por ka humbur jetën në kushte të një përplasje aksidentale.
Kjo nuk përcakton që personi është vrarë me një plumb që ka ardhur nga qielli, por që humbja e jetës është rezultat i një përplasje aksidentale, që nuk ka qenë pjesë e një operacioni, se ka raste kur policia vendos në një operacion që një person i rrezikshëm duhet asgjësuar.
Ai pension është shprehje e solidaritetit me familjen, e motivit pse dhe si ne e kuptojmë një detyrë, është trajtuar me këtë tekst. Por kjo nuk ka lidhje me aksidentin, në kuptimin e vendosjes së një fjale përfundimtare të çështjes gjyqësore”, përfundoi Rama.
