Policia italiane ka shkatërruar ditën e sotme një rrjet mafioz në Siçili, i cili dyshohet të ketë keqpërdorur fondet e BE-së të dedikuara për fermerët.
Mediat italiane shkruajnë se grupi mafioz “Tortorici” mund të ketë përfituar deri në 10 milionë euro përmes skemave mashtruese. Nga operacionet e policisë që u zhvilluan në orët e para të mëngjesit, raportohet të jenë arrestuar 94 persona si dhe janë bllokuar 151 biznese të lidhura me anëtarët e këtij grupi.
Në mesin e të arrestuarve janë udhëheqësit e dy familjeve mafioze, një noter, disa ndërmarrës dhe administratorë publikë, të cilët e kishin për detyrë t’i ndihmonin fermerët për të pasur qasje në fondet e BE-së. Grupi mafioz ka bërë deklarime false se posedon toka private, kur në të vërtetë ato ishin pronë publike.
Mësohet se 48 persona janë dënuar me burg ndërsa për pjesën tjetër është marrë masa e arrestit shtëpiak.
