Ilir Allkja, mjek në Urgjencën e QSUT ka njoftuar përmes një videoje në Facebook se është futur vetë në karantinë, pasi konstatoi se kishte vizituar tre pacientë që rezultuan më pas pozitivë.
Në një video të shpërndarë në Facebook, ai lëshon një apel të hapur se me rëndësi është veshja speciale, për të mbrojtur mjekët dhe pacientët.
Ilir Allkja është dërguar pa veshjet speciale për të vizituar tre pacientë, dhe rrjedhimisht dyshon se është infektuar edhe vetë.
“Më dëshpërim kam konstatuar se njësia e Koordonimit të Urgjencave, na dërgojnë pa veshjet speciale në raste që na i paraqesin dhe neurologjike apo gastroentorologjike, por kemi konstatuar se janë raste me koronavirus.
Ne kemi shkuar atje me maskë kirurgjike, ndërkohë që duhej të shkonim me veshje të posaçme. Unë kam një thirrje për kolegët e Koordinimit të Urgjencave Mjekësore dhe drejtorin Skëndër Brataj: Kërkoni dhe pyesni nëse pacientët kanë temperaturë dhe simptoma respiratore. Ne duhet të punojmë me mençuri, që të kursehet jeta e çdo shqiptari. Ju lutem na nisni me veshje speciale, për çdo rast të dyshuar”, shprehet mjeku.
