Çdo ditë në vendin tonë ka një fluks të shtuar të pacientëve me koronavirus. Në kohën kur në spitale është e papërballueshme mjekimi i pacientëve me COVID-19, Ministria e Shëndetësisë ka menduar për të hedhur hapin e radhës. Sikundër është njoftuar edhe më herët, dy spitalet e tjera COVID do të jenë në dispozicion të personave të infektuar.
Ministria e Shëndetësisë ka nisur përgatitjet për hapjen e 2 spitaleve të reja COVID-19, të cilat do të trajtojnë pacientët me koronavirus.
Drejtori i qendrës kombëtare të Urgjencave, Skënder Brataj, tha në një prononcim për gazetën “Shqip”, se aktualisht janë plotësuar me pajisje mjekësore të dyja godinat e caktuara për spitale COVID, godina e ish-kirurgjive në QSUT dhe një ambient tjetër jashtë Tiranës, në autostradë.
Në total do të jenë katër spitale COVID. Duket se rritja e numrit të pacientëve të hospitalizuar, ka përshpejtuar përgatitjet. Duke iu referuar skenarit të hartuar nga Komiteti Teknik i Ekspertëve, hapja e spitaleve ishte menduar të kryhej në vjeshtë, me hyrjen në sezonin gripal të stinës.
Sipas kreut të Urgjencave, Brataj, për të dyja spitalet ka përfunduar kompletimi me pajisjet e duhura mjekësore dhe me stafin mjekësor të nevojshëm.
“Aktualisht ka nisur trajnimi i stafit mjekësor që do të shërbejë në të dyja spitalet dhe pritet hapja e tyre së shpejti”, tha doktor Brataj.
I pyetur për shërbimin e urgjencës, kreu i Qendrës Kombëtare të Urgjencave tha se shumë shpejt do të vihen në dispozicion të qytetarëve 2 ekipe lëvizëse, të cilat do të ofrojnë shërbim mjekësor në banesë ose terapi intensive nëse do të jetë nevoja.
