Ministrja e Shëndetësisë, Ogerta Manastiliu, ka ndarë me ndjekësit në rrjetet sociale video-mesazhin e doktor Perlat Kapisyzit, sipas të cilit virusi ka pësuar mutacion gjenetik duke e bërë me aftësi më ngjitëse, dhe duke rritur ngarkesën virale.
Mjeku thotë se sa më e madhe të jetë ngarkesa virale, aq më e rëndë është forma, aq më e lartë është sëmundshmëria dhe vdekshmëria. Në kushtet që ndodhemi, të mungesës së një mjekimi dhe vaksinës, e domosdoshme është mbajtja e maskës. Pasi sa herë që mbajmë maskën, aq herë mbrohemi.
“Virusi Sars-Cov2 ka pësuar mutacion gjenetik, ku një nga më të rëndësishmit është D614G. Ky mutacion e ka bërë virusin me aftësi më ngjitëse, duke rritur ngarkesën virale tek personi i infektuar.
Tashmë shumë studime që prej vitit 1938, kanë vërtetuar se sa më e madhe ngarkesa virale, aq më e rëndë forma, aq më e lartë sëmundshmëria dhe vdekshmëria.
Dhe në këtë këndvështrim, virusi është bërë më agresiv. Përqasja më efikase në kushtet e mungesës së një mjekimi dhe vaksinës është mbajtja e maskës.
Kjo është sakrifica që kërkohet prej secilit nga ne. Sa herë që vëmë maskën, aq herë mbrohemi. Por edhe mbrojmë, shpëtojmë jetë duke mos lejuar mbylljen, ç’ka do të ishte edhe me pasoja social-ekonomike”, apelon prof. Kapisyzi.
