Virusi misterioz kinez ka pasur një impakt të çuditshëm në ekonominë globale, të paktën kështu shprehen ekspertë të bursës. Prej ditësh, pasi është rritur alarmi për koronavirusin, tregjet globale kanë dalluar një trend për uljen e çmimit të naftës. Kjo gjë ka habitur ekspertët, të cilët pohojnë se zakonisht në kohë krizash, trendi është në kah të kundërt.
Çmimi i naftës së papërpunuar në tregjet e SHBA është ulur deri në 60 dollarë për fuçi këtë të hënë. Besohet se në këtë rënie është duke ndikuar shqetësimi nga përhapja e virusit vdekjeprurës në Kinë. Një fuçi nafte u shit për 1.63 dollarë më lirë ose 3 për qind. Ulje të vlerës shënuan edhe tregjet e bursave.
Nga ana tjetër, Abdulaziz bin Salman Al-Saud, ministri saudit i energjisë është shprehur se OPEC do të marrë masat e duhura pavarësisht ndryshimeve në kërkesa.
“Tregjet po ndikohen kryesisht nga faktorët psikologjikë dhe pritjet tepër negative nga disa pjesëmarrës, pavarësisht ndikimit shumë të kufizuar të virusit në tregun botëror”, tha ministri.
