Në shkurtin e vitit 1991, Partia e Punës, e ndjente se pas shpalljes së pluralizmit, po i rrëshqiste pushteti nga duart. Ndaj ajo vendosi të përdorë cilindo që mundej, nga ata që u kishte bërë lavazh truri për gjysmë shekulli, për të mbrojtur sundimin e saj.
Në këtë kuadër, nuk u kursyen as të burgosurit ordinerë. Teksa shumë shqiptarë po kërkonin rotacion, pas 50 viteve vuajtje në diktaturë, të burgosurit për vepra ordinere në burgun e Tërnovës, kryesisht për vjedhje, i dërgojnë më 19 shkurt 1991, një telegram presidentit të kohës, Ramiz Alia.
Ata shprehen kundër krijimit të Partisë Demokratike, dhe propozojnë që ajo të “likuidohet” me ligj si parti politike. Të burgosurit paralajmërojnë demokratët të mos luajnë më figurën e Enver Hoxhën, në të kundërt do ta pësojnë keq.
“Duam t’ju bëjmë thirrje këtyre fluturakëve, me çdo gjë të luajnë, le të bojkotojnë ç’të duan e në cilëndo parti të shkojnë, udha e mbarë u qoftë, por me Enver Hoxhën mos të luajnë, se vërtet pak jemi, por miliarda për të bëhemi”, thuhet në letrën e tyre, që mbyllet me një përbetim për tejkalimin e planit në nxjerrjen e kromit.
