Vijon të jetë në qendër të mediave greke vrasja e nënës së re 20 vjeçare ndodhi mëngjesin e së martës së 11 majit. Detaje të reja janë zbuluar nga krimi në Glyka Nera ku gjatë një grabitje mbeti e vrarë 20-vjeçarja Caroline. Mediat greke kanë raportuar sot se janë zbuluar disa pamjet ku tregohet rruga që ndoqën autorët e grabitjes për tu larguar.
Në këtë pamje thuhet se makina e autorëve u pa fillimisht që hyn në rrugicën e banesës ku ndodhi ngjarja, ndërsa pas rreth dy orësh kthehet dhe zhduket me shpejtësi. Ndërkohë nga ana tjerë bashkëshorti i Carolinës ka kërkuar që t’u jepet fund aludimeve dhe ngjarja të zbardhet. Sjellim ndërmend se ditët e fundit kanë lindur thashetheme lidhur me skenarin e vrasjes në banesën e tyre në Panagouli Street.
Ai është shprehur se është i shokuar nga raporti për psikologun që gruaja e tij ishte për vizitë. “Unë me të vërtetë nuk e di kush mendoi se psikologu tek i cili shkuam pasi gruaja ime lindi kishte ndonjë lidhje me grabitjen. Kam dëgjuar spekulime por që psikologu ynë do të ndihmojë për të gjetur autorët, është larg të imagjinueshmes”, mësohet të ketë thënë ai.
Hetimet për vrasjen
Vrasja e 20-vjeçares Caroline Crouch në Glyka në lagjen Glika Nera të Athinës, në prani të foshnjes së saj, prej ditësh ka qenë në qendër të raportimeve në mediat greke. Policia greke prej ditësh, po punon në mënyrë intensive për zbardhjen e plotë të ngjarjes, por ende nuk ka arritur të identifikojë asnjë prej autorëve të dyshuar të vrasjes së rëndë. Gjatë dëshmisë së dhënë në polici bashkëshorti i Carolinës, piloti 32 vjecar që i mbijetoi sulmit të autorëve, ka bërë një përshkrim të grabitësve të cilët çuan drejt vrasjes së pamëshirshme të partneres së tij.
“Dy ishin relativisht të gjatë, afërsisht nga 1.80, të dobët, por të palestruar. Ndërsa i treti ishte më i shkurtër, rreth 1.70 dhe ai dukej të ishte kreu i grupit” ka deklaruar para grupit hetimor Charalambos Anagnostopoulos. Sipas medias greke “Espresso”, autori i krimit i cili ishte më i shkurtër se të tjerët dyshohet se është një shqiptar, i cili është shpallur në kërkim për një sërë krimesh të tjera dhe si i përfshirë në organizatë kriminale, vrasje në tentativë, grabitje. Nga raportimet e policisë greke, bëhet me dije se 3 grabitësit ishin pjesë e një bande kriminale shqiptaro-greke. Pak ditë më parë, forcat policore të Greqisë arrestuan një tjetër shtetas me origjinë nga Gjeorgjia, pasi u kap me një pasaportë të falsifikuar. Fillimisht u dyshua se ai ishte një nga autorët e vrasjes së 20 vjecares britaniko-filipinase, por më pas hetuesit e cështjes pohuan se këto dyshime u zbehen.
Vrasja e nënës së re 20 vjeçare gjatë kohës kur 3 grabitësit që hynë në banesën e saj e mbytën e atë pranë foshnjës dhe bashkëshortit të saj. “Një barbarizëm i tillë është i rrallë për Greqinë”, tha Theodoros Kronopulos, një zëdhënës i policisë greke menjëherë pas zbulimit të ngjarjes, ku bëri të ditur se, policia greke ofroi 300 mijë euro për ata që japin informacione për autorët e kësaj ngjarje të rëndë.
