Ajo çfarë aludohej dhe përflitej gjatë dy vjeçarit të fundit për Berishën, sot u faktua. Ish-kryeministri Sali Berisha, së bashku me familjen e tij, është shpallur “non grata” nga Shtetet e Bashkuara të Amerikës.
Por duket se ky vendim nuk ka qenë surprizë për Kreshnik Spahiun, Edi Ramën, gazetarin Artan Hoxha e shumë të tjerë, të cilët kanë folur për futjen e Berishës në listën e zezë.
Një video e cila është bërë virale, fakton atë çfarë ka thënë kryeministri Rama dy vite më parë. Në një seancë parlamentare të vitit 2019, kryeministri Edi Rama e pyeti specifikisht Berishën nëse udhëtonte dot drejt Shteteve të Bashkuara.
“Sali, ti e kapërcen dot oqeanin me dash?”, tha Rama, duke bërë edhe një lojë fjalësh me fjalën DASH, që është Departamenti Amerikan i Shtetit.
Pas publikimit të lajmit për shpalljen “non grata” të ish-kryeministrit Sali Berisha, kryeministri Rama nuk ka dhënë asnjë koment në lidhje me këtë çështje të ‘nxehtë’. Ai është ndalur në një tjetër tematikë, ku shprehet për një ripërtëritje të mjedisit falë Moratoriumit të Pyjeve dhe të Gjuetisë.
