Në kohën që kryeministri Rama është duke folur në Asamblenë e PS-së për sfidat që e presin në këtë mandat, si edhe pritshmëritë për mandatin e katërt, ish-kryeministri Berisha i është përgjigjur online, duke publikuar një fjalim të tijin të mbajtur disa vite më parë para demokratëve.
Bëhet fjalë për një fjalim të mbajtur në 25 vjetorin e krijimit të Partisë Demokratike, ku Berisha shprehet se ajo duhet të kthehet në një dritë shprese për shqiptarët, të cilët nuk duhet të gjejnë zgjidhjen tek ikja jashtë, por ndërtimi i jetës këtu.
Kjo kundërpërgjigje e menjëhershme vjen pasi Rama deklaroi në Asamblenë e PS-së se duhen edhe dy mandate të tjera, që Partia Socialiste ta çojë Shqipërinë në majën që meriton. Rama ka shprehur synimin edhe të dy mandateve të tjera, duke thënë se pas kësaj, do t’ia lërë radhën brezave të ardhshëm.
“Ai rreth të privilegjuarish, jo individë por strukturë keqbërëse është një nga armiqtë e transformimit jetik. Për ne është etike nëse duam një parti që merr besimin vazhdimisht të shqiptarëve.
Ne kemi fatin ta shkruajmë historinë. Është jetike për ne që të ndahemi nga ajo strukturë nëse duam që Shqipëria të ketë arritur majën që ne kërkojmë, pas dy zgjedhjeve të ardhshme dhe pastaj t’ia lëmë radhën brezave të tjerë”, përfundoi Rama.
