Protesta e banorëve të Astirit para Kuvendit është shoqëruar me përplasje të ashpra, shashka, shkopinj e tymuese. Si pasojë 12 policë mbetën të plagosur, mes të lënduarve është edhe zv.drejtori i Policisë së Tiranës, Dhimitraq Ziu.
Sipas të dhënave paraprake, një efektive i janë prerë 4 gishtat e njërës dorë, pasi protestuesit hodhën kapsolla, ndërsa një tjetër ka humbur dëgjimin nga njëri vesh.
Ndërkohë, disa prej protestueseve u shoqëruan në Spitalin e Traumës në kryeqytet, pasi mbetën të lënduara.
Teksa, kryeministri Rama u shpreh i vendosur se ata që nuk i kanë të legalizuara banesat, nuk do të dëmshpërblehen, banorët thonë se nuk do të tërhiqen. Një prej protestuesve shpreh revoltën nëpërmjet një poezie, për të përshkruar gjendjen ku ndodhen.
“Si peshqesh për Vit të Ri, ti nxjerr fadromën e prish shtëpi. Turpin ta kesh ti, po dil këtu se s’të vret njeri. Mos u mbro me polici. Se ne kemi Perëndi, ju keni polici.”
“Atyre mund t’iu duket shumë e lehtë, por nuk është. Sepse unë nuk kam ndërmend të përfundoj si barbon mes katër rrugëve. Ne do të qëndrojmë deri në fund të mbrojmë shtëpitë tona.”
“Le ta hajë dreqi Ramën. Ne do ta vrasim, ‘qenin e qenve’. Si vjen e na heq nga shtëpitë tona, kur vetë i ka nja 500 vila. Ka bllokuar gjithë Shqipërinë e neve nuk na lë në shtëpitë tona.”
Protesta e banorëve të Unazës së Re para parlamentit zgjati rreth dy orë. Menjëherë më pas erdhi dhe reagimi nga Kryeministri Rama, i cili theksoi se dhuna ndaj uniformës blu, nuk do të tolerohet.
“Dhuna ndaj policëve në emër të paligjshmërisë, s’do tolerohet! U bëj thirrje atyre që kanë dokumente prone a vetëm strehën pa leje: Distancohuni nga zaptuesit profesionistë dhe profesionistët e politikës qorre të shpifjeve e të rrëmujës! Merrni ç’ju jep ligji e largohuni nga rruga.” TIRANA TODAY
