Sikundër ishte njoftuar edhe më herët, kreu i Shtetit Ilir Meta ka mbërritur në ambientet e Prokurorisë së Tiranës. Fokusi është tek përplasja e ashpër e presidentit Meta ndaj kreut të KED, Ardian Dvorani, lidhur me emërimet e anëtarëve të rinj në Gjykatën Kushtetuese. Meta e ka kallëzuar Dvoranin për dy vepra penale “Shpërdorim detyre” dhe “përvetësim i titullit apo i detyrës shtetërore”.
Presidenti është thirrur për të dhënë shpjegime mbi kallëzimin e kryer në Prokurorinë e Tiranës, nga ku është regjistruar një procedim penal ndaj kreut të KED.
Ene nuk ka informacione nëse Meta do të dorëzojë siç kishte paralajmëruar, se do të bëjë publike video komprometuese me fakte përvëluese, e që do të nxirrte manipulimet për zgjedhjen e anëtarëve të Gjykatës Kushtetuese nga ana e KED.
Meta e akuzon Dvoranin se ka shkelur ligjin në dërgimin e listave të kandidatëve për plotësimin e dy vakancave në Gjykatën Kushtetuese, që i përkasin Presidentit të Republikës.
Po ashtu, sipas tij, kreu i KED ka bërë qëllimisht që ta detyrojë kreun e Shtetit të shkelë Kushtetutën që përcakton se Presidenca dhe Kuvendi duhet të shprehen me radhë për vakancat në Kushtetuese. Dhe që presidenti të vendosej në pamundësi për të ushtruar kompetencën e tij për të emëruar gjyqtarin e dytë që i takonte sipas radhës që përcakton Kushtetuta dhe ligji.
