Më 29 Qershor, Brukseli pritet të shprehet mbi negociatat e pranimit të Shqipërisë në Union, ndërkohë situata politike në vend mbetet e tensionuar. Në skenë ka zbritur sërish çështja e Teatrit Kombëtar. Bashkë me të edhe kryebashkiaku Veliaj.
LEXO EDHE: Video/Dorëzohet Veliaj, Vokshi e përzë. Mazhoranca e ndjek nga pas
Si drejtues i një “cirku shëtitës” (termi që aq shumë e preferon kryebashkiaku t’i etiketojë protestuesit kundër shembjes së teatrit) Veliaj ka ndërmarrë një tur dëgjesash me grupet e interesit mbi ndërtimin e Teatrit të ri.
Ditën e sotme, ia befti krejt i pa ftuar në Komisionin e Medias, në krah të ministres së Kulturës. Por, iu desh të përballej me grupin parlamentar të Partisë Demokratike, i cili e nxori me forcë jashtë sallës kryebashkiakun, duke e cilësuar si “mashtrues”, “Zogu i Tiranës”, “vrasës” etj., epitete të cilat Veliaj tentoi t’i anashkalojë me fabulat banale dhe moraliste para mediave.
E gjithë veprimtaria e këtij komisioni u shndërrua në një shfaqje banale, ku askush nuk dëgjonte njeri, dhe të gjithë akuzonin njëri-tjetrin, aq sa shkuan deri në përplasje midis gardistëve dhe deputetëve të Partisë Demokratike.
Sherri dhe sabotimi i çdo aktiviteti të mazhorancës është shndërruar në një instrument të opozitës për të kundërshtuar qeverinë në shumë raste, dhe jo pa të drejtë, duke nisur që nga mënyra sesi Veliaj kërkon të ndërtojë teatrin ashtu edhe me turin e dëgjesave false dhe arritjeve imagjinare të Edi Ramës.
Për këtë të fundit PD organizoi në fundjavë një anti-miting në Dibër, në kohën kur kryeministri kishte shkuar të inauguronte fillimin e punimeve për rrugën e Arbrit.
LEXO EDHE: Video/ “Nuk dalim gjallë nga atje”, biseda që i anuloi Ramës takimin në Mat
Nga përplasja e dhunshme, mbeti i lënduar deputeti Xhemal Gjunkshi, ndërsa u proceduan penalisht 26 militantë. Po në fundjavë Bashkia e Hasit, e drejtuar nga PS shpalli qytetar nderi ish-deputetin Gafurr Mazreku.
Në vjeshtën e vitit 1997, ai plagosi me pistoletë në Kuvend pas një debati për motive të dobëta Azem Hajdarin, liderin e Lëvizjes Studentore.
PD e denoncoi këtë skandal, ndërsa Sali Berisha shkoi më tej duke e kërcënuar Edi Ramën me Kanun. Gjuha e ashpër e ish-kryeministër imponoi distancimin e vonuar publik të Edi Ramës, ndaj “këshilltarëve të papërgjegjshëm”.
Por kujt i intereson radikalizmi i situatës politike në vend, veçse Ramës dhe dyshes Basha-Kryemadhi. Nëse nuk çelen bisedimet e anëtarësimit, Rama do bëjë fajtore opozitën radikale.
Ndërkohë Bashës, i duhet ky tensionim për të mbështetur tezën, se ky vend është ende larg nga të qenit normal. Ndërsa politikanët bëjnë edhe shiun edhe diellin, të humburit nga këto lojëra bajate janë si zakonisht shqiptarët e thjeshtë.
Përveç largimit masiv nga vendi, këta të fundit s’kanë qenë të aftë t’i japin një përgjigje të fortë kësaj shpure të korruptuarish.
TIRANA TODAY
