Kryetari i PD-së, Lulzim Basha, në një takim për mediat pas takimit me ambasadorin e ri gjerman Peter Zingraf, lëshoi një lum akuzash ndaj PS-së. Ai tha se Prokuroria po mbron politikanët e korruptuar, dhe se deputetët e PS-së janë të përfshirë në krime zgjedhore.
Po kështu, Basha paralajmëroi se PD do shpalosë një platformë masash, si një ofertë kombëtare për të mos humbur më shumë kohë dhe mundësi, duke mbyllur derën e Europës për Shqipërinë.
Kryedemokrati shtoi më tej se Arta Marku dhe Donika Prela janë dy “Katicat” e Edi Ramës në Shqipëri, dhe nga sot ato duhet të ndiqen penalisht për “shpërdorim detyre”, pas dorëzimit të dosjes “184” për hetim në Dibër.
“Është një veprim i dy Katica të Prokurorisë së Përgjithshme dhe të Krimeve të Rënda, që veprojnë si pjesë e grupit të strukturuar kriminal të Rilindjes.
Ato janë aty për të mbrojtur politikanët që janë kapur duke vjedhur votat e qytetarëve. Guximi që kanë marrë për të mbyllur dosjen, tregon që dëshpërimi i Ramës dhe organizatës së tij është i tillë, sa ka vendosur t’i shtyjë edhe këto dy masha, Marku e Prela, drejt vetëflijimit, sepse me veprimet që kanë ndërmarrë sot, të dyja janë penalisht të ndëshkueshme nga ligji.
Kanë bërë “shpërdorim detyre”. Të dyja prej këtij momenti duhet të ndiqen penalisht. Kanë zgjedhur dhe meritojnë të quhen Katicat e Shqipërisë. Katica është prokurorja speciale e Maqedonisë së Veriut. Këto ngjarje tregojnë degjenerimin përfundimtar të Ramës, dhe bandës së tij”, tha Basha.
