Zgjedhjet lokale të 30 qershorit, u zhvilluan në një atmosferë të qetë. Presioni i fortë i SHBA-së dhe BE-së, shmangu çdo lloj skenari ogurzi për përplasje civile dhe vëllavrasje.
Krahasuar me retorikën politike që i parapriu, e diela na dha një leksion qytetarie. Nga ana tjetër, këto zgjedhje ishin më të çuditshmet e zhvilluara në Shqipëri 3 dekadat e fundit.
Opozita kryesore, PD dhe LSI, refuzoi të marrë pjesë, për shkak të dyshimeve mbi ndershmërinë e tyre. Për pasojë, qindra mijëra shqiptarë, nuk patën mundësi të shprehin vullnetin e tyre për kandidatët alternativë. 30 qershori nuk ishte një leksion demokracie. Ai do të ironizohet, dhe do të mbahet nëpër gojë për shumë kohë.
Vetë OSBE do të ketë vërejtjet e veta, por në fund do ta certifikojë atë. Për shkak se vetë është investuar fort, që zgjedhjet të mbaheshin edhe në ato kushte. Por të dielën morën fund eksperimentet e rrezikshme me bojkotin dhe stabilitetin e vendit. Nga tani e tutje, asnjë forcë politike, nuk mund të kërcënojë t’i vërë zjarrin Shqipërisë, për interesat e lidershipit të saj.
Ndërkohë, kriza politike mes palëve mbetet po aty. Gjërat mund të nisin të qartësohen me ngritjen e trupës së re të Gjykatës Kushtetuese, SPAK dhe Byrosë Kombëtare të Hetimit. Mazhoranca duket e vendosur të shkarkojë presidentin Ilir Meta. Ndërsa organet e reja hetimore, mund të sjellin zhvillime dramatike në politikën shqiptare.
