Policia ka identifikuar autorin e ngjarjes së mbrëmshme, i cili kishte vendosur një sasi tritoli në oborrin e një banese në Fushë Krujë.
Mësohet se autori është shtetasi A. B., i cili është shpallur në kërkim nga policia, pasi akuzohet për shfrytëzim seksual të një 17-vjeçareje dhe ushtrimin e veprimtarisë kriminale në fushën e kultivimit të kanabisit.
Lënda plasëse është hedhur në banesën e 17-vjeçares, e cila ishte shfrytëzuar seksualisht nga 4 persona të cilët u arrestuan një ditë më parë. Ndërsa u shpallën në kërkim edhe 2 persona të tjerë të implikuar në ngjarjen e rëndë.
Fatmirësisht tritoli nuk ka shpërthyer, ndërsa ekspertët e anti-eksplozivit të RENEA-s, kanë bërë të mundur heqjen e lëndës së rrezikshme.
Një ditë më parë, policia njoftoi se të arrestuarit “kanë nxitur për përdorimin e drogës një 17-vjeçare dhe e kanë shfrytëzuar seksualisht atë”.
Njoftimi i policisë:
Hodhi një pako me lëndë plasëse artizanale në ambientet e jashtme të një banese, por pa shkaktuar shpërthim, Policia në kohë rekord identifikon dhe shpall në kërkim autorin e dyshuar të ngjarjes.
Më datë 12.07.2020, rreth orës 23:00, në ambientin e jashtëm të banesës së shtetases M. F., në Fushë Krujë, është gjetur një pako brenda së cilës dyshohej se kishte lëndë plasëse, e cila nuk ka shpërthyer.
Menjëherë në vendngjarje kanë shkuar forcat antieksploziv të RENEA-s dhe pas verifikimeve ka rezultuar se brenda pakos kishte një sasi të vogël lëndë plasëse artizanale.
Si rezultat i hetimeve grupi hetimor ka bërë të mundur identifikimin e autorit të dyshuar të kësaj ngjarjeje, i cili është shtetasi A. B., dhe po punohet për kapjen e tij.
