Në një konferencë të jashtëzakonshme, Presidenti Ilir Meta ka folur edhe për shkarkimin e tij, i cili pritet të diskutohet në seancën parlamentare të së enjtes nga qeveria Rama. Meta ka ironizuar duke u shprehur se
“Nuk e kuptoj pse duan të më shkarkojnë, unë kam deklaruar nga Pogradeci që jam i gatshëm ta le këtë detyrë vetëm për të zgjidhur këtë krizë dhe të vendoset demokracia në vend. Këtyre u intereson më shumë shkarkimi im, se zgjidhja e krizës. Jam i surprizuar nga reagimi i Ramës, pres të reflektojë”, u shpreh Meta
Po ashtu presidenti sqaroi se vendimi për të anuluar datën e zgjedhjeve nuk është diskutuar me asnjë aktor politik nga opozita dhe se ky vendim nuk është marrë për të plotësuar tekat e tyre.
“Zoti Basha e ka marrë vesh këtë vendim vetëm pak para se të bëhej publike dhe e ka bërë përmes një telefonate zyrtare. Ishte një telefonatë me sekretarinë ku i kërkohej që të ndërpritej manifestimi në momentin e parë që do të kishte skena të dhunshme, po ashtu iu komunikua edhe vendimi për të shtyrë zgjedhjet. Nuk është një vendim për të plotësuar tekat e opozitës,”, shtoi Meta.
