Ish-futbollistit të Shkumbinit, Andi Bakiasi, i është hequr me kusht përjashtimi përjetë nga futbolli për dhunimin e gjyqtarit të sfidës së sezonit të kaluar në Kategorinë e Parë me Dinamon. Mbrojtësit 32-vjeçar lushnjar, i është hequr dënimi ekstrem, ndërsa është në një periudhë prove në një vit. Andi Bakiasi është paralajmëruar se në rast përsëritje të një tjetër shkelje disiplinore, do të ndëshkohet sërish.
Vendimi i Komisionit të Disiplinës për Andi Bakiasin
Pranimin e kërkesës së lojtarit Andi Bakiasi, duke pezulluar zbatimin e dënimit. Në bazë të Nenit 32/4/5 të KDS, lojtari vendoset në provë për një afat 12 (dymbëdhjetë) mujor dhe në rast të përsëritjes të shkeljes disiplinore gjatë periudhës së provës, dënimi i pezulluar i shtohet dënimit të ri.
Dhuna ndaj gjyqtarit të sfidës Shkumbini-Dinamo 1-1, Sokol Bebja, i kushtoi klubit peqinas skualifikimin nga gara, zbritjen në Kategorinë e Dytë dhe gjobitjen me 10 milionë lekë. Sfida u luajt në 14 dhjetor të vitit të kaluar, dhe Bebja u godit nga tifozë dhe lojtari Bakiasi për shkak të pretendimeve për gjykim jo korrekt të sfidës.
