Kjo javë do të jetë vendimtare për masat që do të ndërmerren më tej. Ky ishte përfundimi i dhënë nga Komiteti Teknik i Ekspertëve, referuar masave shtesë nëse do të ketë një situatë më të rënduar. Zv.ministrja e Shëndetësisë, njëherësh drejtuesja e Komitetit të Ekspertëve, Mira Rakacolli, ka paralajmëruar se nëse shifrat do të kenë një rritje të ndjeshme, atëherë do të ketë shtim masash.
“Këtë javë, gjendja mbetet relativisht e qëndrueshme dhe do të na duhet dhe një javë tjetër për të parë a do të vazhdojë kjo qëndrueshmëri dhe në bazë të vlerave që do të kemi këtë javë, do të gjykohet nëse do të ngelemi në nivelin e këtyre masave apo do të ketë nevojë për masa të tjera ndërhyrëse. Pra është një javë e rëndësishme në vlerësimin epidemiologjik të situatës, në lidhje me rastet që do të paraqiten dhe në lidhje me se si do të ndryshojnë treguesit indikatorë që na çojnë ne në vlerësim të efikasitetit të masave që janë marrë dhe në gjykimin sesi do të vazhdojë gjendja”, tha Rakacolli.
Nga ana tjetër, drejtoresha e ISHP-së, Albana Fico, tha se Shqipëria vijon të ketë incidencë më të ulët se mesatarja e Bashkimit Europian. Ajo bëri të ditur se qarqet më problematike janë Tirana, Gjirokastra dhe Lezha.
“Incidenca është 356 raste për 100 mijë banorë, dhe kjo shifër mbetet më e ulët se vendet e rajonit dhe më e ulët se mesatarja e vendeve të Bashkimit Europian. Dy prefekturat me incidencë më të lartë janë Tirana e Gjirokastra dhe më pas Lezha. Grupmoshat më të prekura 55-64 vjeç dhe më pas 65-75 vjeç. Ka rritje të lehtë të rasteve që kanë nevojë për terapi intensive”, sqaroi Fico.
