Nënkryetari i LSI-së, Petrit Vasili, ka folur lidhur me marrëdhënien shumë të komentuar së fundmi mes Ramës e Metës. Në një lidhje direkte me ‘News24’, Vasili u shpreh se ka pasur bashkëpunim vetëm për hir të krizës së koronavirusit. Ai i mëshoi fort faktit se nëse nuk do të kishte bashkëpunim, situata do të ishte kritike.
Lidhur me zërat kritikë, ai konfirmoi se s’ka marrëdhënie të ftohta e të ngrohta mes presidentit dhe kryeministrit.
“Pandemia e koronavirusit, ka tronditur botën. Gjendja e fatkeqësisë u vendos, pas insistimit tonë. Sensi kritik e aktiv i presidentit ishte shpëtimtar që të mos kishim një legjislacion penalizues dhe anti-demokratik.
Ne bëmë që legjislacioni ynë të afrohet me atë të Danimarkës. Zgjatja e afatit të pandemisë së virusit është e pakuptimtë.
Nëse nuk do të kishte bashkëpunim, situata do të ishte kritike. S’ka marrëdhënie të ftohta e të ngrohta mes Metës dhe Ramës. Bashkëpunimi ishte domosdoshmëri, për të minimizuar krizën. Por, qeveria vazhdon që të bëjë gabime në politikat për karantinën, teksa ka edhe mungesë të mjekut të familjes”, tha Vasili.
