Për të dytën ditë radhazi, vijon mbledhja e firmave nga ana e familjarëve të Mateo Vasiut, pasi kërkojnë dënimin me vdekje të vrasësit të të miturit, Klodian Çalamani.
Në një gjendje të rënduar psikologjike dhe emocionale, familjarët nuk ndalen në mbledhjen e firmave në qendër të qytetit të Fierit. Ka qenë fotoja e vrasësit Çalamani, ai i cili ka tensionuar situatën sot, teksa mes lotësh, e ëma ka grisur posterin ku ishte e vendosur fotoja e viktimës dhe autorit.
Ndërsa puthte të voglin, ajo u pa duke goditur foton e Klodian Çalamanit, ndërsa pas saj vrapoi i shoqi duke e grisur gjysmën e posterit.
Familjarët janë treguar të vendosur në mbledhjen e firmave, dhe shpalljen e dënimit me vdekje për autorin.
Vrasësi nuk u dërgua në gjykatë, për shkak të situatës së tensionuar me familjarët e viktimës. Pas kësaj mase të sigurisë, familjarët nisën mbledhjen e firmave, që ndaj Çalamanit të vendoset dënim me varje.
