Një ditë pas publikimit të raportit vjetor, Komisioneri për Zgjerim dhe Fqinjësi në BE, Oliver Varhelyi nga Shkupi tha se Maqedonia e Veriut përmbush kushtet për konferencën e parë ndërqeveritare, por për këtë qëllim nevojitet edhe miratimi i Bullgarisë.
Varhely tha se pa tejkalimin e mosmarrëveshjeve mes dy vendeve, negociatat për anëtarësim nuk mund të fillojnë, shkruan Alsat.
“Është në interes të Bullgarisë dhe Maqedonisë së Veriut të gjejnë zgjidhje. Pa mirëkuptim në këto çështje, do të jetë shumë e vështirë të vijohet më tej. Është koha të arrihet një marrëveshje. Ne shohim angazhim dhe jemi optimistë”, tha Varhelyi.
Ndërkohë, Kryeministri Zoran Zaev tha se prioriteti i qeverisë së tij është plotesimi i kushteve për integrimin.
“Raporti i Komisionit Europian publikohet në periudhën e riafirmimit të reformave dhe programit të Qeverisë. Ai paraqet mjet të shkëlqyeshëm të prioriteteve dhe planeve tona në periudhën e ardhshme”, u shpreh Zaev.
