Reuters
Shtetet e Bashkuara do të shpenzojnë 3.5 miliard dollarë për të blerë dhe dhuruar 500 milion doza të vaksinës Pfizer për disa nga vendet më të varfra në botë, u bë e ditur sot, të enjten, duke u kërkuar gjithashtu vendeve të tjera të G7 të ndjekin shembullin.
Dhurimi i vaksinave – më i madhi i bërë ndonjëherë nga një vend i vetëm – u njoftua para se Presidenti i SHBA-së Joe Biden të takohej me udhëheqësit e Grupit të Shtatë Ekonomive të Avancuara në Anglinë Perëndimore.
500 milion doza janë të destinuara për 100 vendet më të varfra në botë. Një zyrtar i lartë në administratën e Biden e përshkroi gjestin si një “hap të rëndësishëm përpara që do të tejkalojë përpjekjen globale” me synimin “të sjellë shpresë në çdo cep të botës”.
“Ne me të vërtetë duam të theksojmë se në thelb është qëllimi i vetëm, të shpëtohen jetë,” tha një zyrtar, duke shtuar se Uashingtoni nuk po kërkon favore në këmbim të dozave.
