Nga Anxhela Ferra
Shqipëria është një nga vendet më të bekuara për rritjen e produkteve ushqimore. Por, përherë e më tepër flitet për përdorim pesticidesh, plehrave me bazë nafte, ushqime të modifikuara gjenetikisht, kimikate në mish e sallam. Gazetari Mentor Kikia në një intervistë për Tirana Today denoncon përdorimin së fundmi të vajit të palmës nga prodhuesit më të mëdhenj vendas. Edhe pse nuk është i rrezikshëm drejtpërdrejtë, përdorimi i tij ka sjellë modifikimin e produkteve që ne blejmë çdo ditë.
“Vetëm në vitin 2018-të në Shqipëri kanë hyrë 3 mijë e 500 ton vaj palme. I cili përdoret në restorante dhe për produktet e bulmetit. Mashtrohen konsumatorët duke i vënë etiketa e emra të ndryshme. Qumështit të lopës, dhisë apo deles i hiqet yndyra shtazore tërësisht dhe mbetet një lëng i bardhë pa asnjë shije. I shtohet vaji i palmës me të cilin prodhohet djathi, gjiza, kosi, gjalpi.
Nuk po blejmë djathë, por një masë të bardhë që nuk duhet të quhet më djathë, pasi ky i fundit si çdo produkt tjetër ka formulën e tij. Në momentin kur ti ndryshon strukturën i heq një përbërës dhe i fut një tjetër, ky nuk është më djathë. Ti shkon në dyqan për të blerë djathë dhie, por ai nuk është i tillë. Është djathë me vaj palme dhe esencë dhie.
Ti do të konsumosh djathin e lopës, por ai është një produkt që ka për bazë vajin e palmës. Dhe asnjë prej atyre kompanive nuk e deklaron në etiketë që produkti ka vajë palme. Nëse shkon nëpër dyqane sheh dhjetëra produkte, djathë Tepelene, Përmeti, Delvine, Sarande, Lezhe. Djathë jugu, djathë veriu dhe askush nuk është në gjendje të thotë se kush e ka prodhuar këtë djathë. Ky vaj palme për të cilin ne po flasim, sipas ekspertëve përdoret sot në çdo fast-food. Në një pjesë të konsiderueshme të restoranteve. Por, jo thjesht përdoret, ajo ripërdoret disa herë.
Me të njëjtin vaj skuqen patatet për disa herë. Dhe ripërdorimi i këtij vajit është i rrezikshëm. Nga informacionet e mija më rezulton se vaji i palmës përdoret pothuajse në të gjitha fabrikat e prodhimit të bulmetit. Ato që mbushin sot frigoriferët e supermarketeve me qumësht, kos, djathë, gjalpë etj. Janë ato kompani që bëjnë reklama nëpër televizione.
Ky është mashtrimi i madh që ndodh në Shqipëri dhe kjo gjë nuk po zgjidhet. AKU është një institucion modest në krahasim me problematikën që ka vendi. Është një institucion me pak burime njerëzore, me pak fonde, pa laboratorë të nevojshëm. Kjo është pjesë e infrastrukturës që i mungon. Pjesa tjetër është korrupsioni, pasi nuk penalizohen asnjëherë prodhuesit e mëdhenj. Ata që sundojnë tregun dhe spekulojnë në mënyrë skandaloze.
Kikia shprehet se fajtor për situatën e rëndë të ushqimit nuk janë vetëm institucionet, por të gjitha hallkat abuzojnë.
Prodhuesit e pijeve alkoolike, një fushë skandaloze ku abuzimi është në flagrancë. Prodhohen verëra, raki,vodka apo pije të ndryshme me alkool industrial dhe me sheqer. Duke mos pasur asgjë organike në përbërjen e tyre. Prodhuesit e mishrave dhe sallameve të cilët fusin kimikate shumë herë më tepër sesa norma e lejuar për t’i rritur jetëgjatësinë produktit të tyre.
Tek fermerët të cilët nga etja për të nxjerrë sa më shpejt produktin e tyre stimulojnë në mënyrë artificiale rritjen apo pjekjen. Duke sjellë edhe atë shalqirin që nga jashtë duket si një frutë i këndshëm, por brenda ka thjeshtë një top të pangrënshëm të rrezikshëm.”
Në një kohë kur institucionet përkatëse çalojnë në mbrojtjen e konsumatorit, gazetari bën thirrje që çdokush të jetë më i kujdesshëm çfarë zgjedh, duke filluar nga çmimi.
“Ushqimi nuk është një bombë që plas dhe të merr jetën menjëherë. Ushqimi është një bombë që plas sot dhe ta merr shpirtin ngadalë. Atë që ti merr sot përmes ushqimit do ta paguash nesër përmes sëmundjeve, origjina e të cilave nuk dihet. Por, ndërkohë që ne do të vuajmë pasojat e këtij ushqimit. Ata që po pasurohen me ushqimet që na shesin neve, do jenë duke shijuar jetën në lagjet më të pasura të Vjenës. Dhe ne thjesht do të jemi njerëz të dënuar.
Unë personalisht më mirë preferoj të blej një rrobë shumë të lirë, sepse nga ajo nuk më gjen gjë. Por, tek ushqimi përpiqem të blej atë që është më i miri dhe jo më i liri. Ushqimet e lira janë të gjitha të falsifikuara. Nuk mund të ketë verë që kushton 250 lekë një shishe, apo lëng frutash që 1.30 litër kushton 100 lekë; kurrë. Nuk ka kosto që mund ta justifikojë, janë të gjitha produkte artificiale. Esencë, sheqer, ujë. Ndaj atë që nuk po e bën shteti, ta bëjnë konsumatorët vetë.”/ TIRANA TODAY
