Ministri i Rindërtimit, Arben Ahmetaj ka folur në lidhje me planin financiar që prezantoi mbrëmjen e djeshme kryeministri Rama në lidhje me situatën e krijuar nga koronavirusi.
Në një intervistë për News24, Ahmetaj sqaroi se si bizneset do të përfitojnë nga kjo paketë. Ministri deklaroi se qeveria ka dhënë garanci sovrane prej 100 milionë dollarësh. Sipas tij, të gjitha bizneset mund të paraqiten në banka si klientë me risk zero dhe të kreditohen me interesa të ulëta, për të paguar pagën bruto të punonjësve të tyre.
“Instrumenti i parë është ai i garancisë sovrane me 100 milionë dollarë. Qeveria firmos një garanci, që iu garanton të gjithë bizneseve, që të trokasin te dera e bankës si një klient me zero risk dhe kreditohet me interesa të ulëta, për të paguar pagën bruto të punonjësve të vet. Instrumenti është për të gjitha bankat në Shqipëri dhe funksionon që nga dita e martë, se e hëna është pushim. Çdo sipërmarrës për bankën është me risk zero, se e ka garantuar qeveria.
Një sipërmarrës në një kohë normale shkon te dera e bankës, kjo e fundit hulumton sa i besueshëm është, i kontrollon financat. I gjithë ky diskutim bie poshtë, pasi e ka garantuar buxheti i shtetit. Kjo është periudha më e vështirë që po kalon Shqipëria. Masa e dytë është 120 milionë dollar nxjerr buxheti i shtetit, një pjesë për biznesin e vogël, një pjesë për shëndetësinë dhe një pjesë për emergjencat civile. E gjitha kjo është një paketë humanitare. Ka dhe një 10 milionë dollar, brenda paketës, për të papriturën e ditës. Ne presim të papritura që nuk i presim kurrë”, tha ai.
Ndërkohë, Ahmetaj tha se nuk është vendosur akoma se si do të bëhet shpërndarja e lekëve për njerëzit në nevojë.
“Ne kemi krijuar një Task Forcë, dhe do të vendoset ditët në vijim si do të bëhet shpërndarja. Do verifikohet numri i të papëunëve”, sqaroi ai.
