Nga ora 13:00, në të gjithë Shqipërinë nis aplikimi i masave të reja shtrënguese. Me urdhrin e ri, lançuar nga kryeministri Rama, është vendosur që lëvizjet të jenë vetëm nga ora 05:00- 13:00. Ky do të jetë në vijim edhe orari i pikave të shitjes së ushqimeve, ilaçeve apo shërbimeve bankare, si edhe orari i punës së punonjësve të administratës.
Më pas nga ora 13:00, gjatë gjithë ditës së dielë, deri të hënën në orën 05:00, do të jetë gjithçka e mbyllur, në të gjitha qendrat urbane të Republikës së Shqipërisë.
Në rrugë do të jenë vetëm forcat e policisë, ushtrisë, njësive kritike të shërbimeve shtetërore dhe atyre të kompanive mediatike.
Këto masa të rrepta vijnë pasi një pjesë e mirë e qytetarëve, ende nuk janë ndërgjegjësuar mjaftueshëm, ndërkohë që sipas qeverisë, nuk duhet humbur asnjë orë më shumë.
Në vendin tonë janë konfirmuar deri tani 70 raste, dhe se qeveria ka përforcuar masat. Nga sot do të kufizohet qarkullimi në oraret 05:00-13:00.
Një lajm i mirë vjen nga pacientët. Është shëruar pacienti i dytë nga koronavirusi në Shqipëri. Babai i 28-vjeçarit, “pacientit zero” për Shqipërinë, ka rezultuar negativ për të dytën herë pas testimit për koronavirus.
Lajmi u bë i ditur përmes njoftimit të Ministres së Shëndetësisë, Ogerta Manastirliut, e cila është shprehur gjithashtu se përveç tij, një tjetër pacient është drejt shërimit, pasi testimi i parë ka dalë negativ. Sipas njoftimit të saj, dy pacientë po bëhen gati të lënë spitalin Infektiv, dhe të dy kanë qenë kontakte të pacientit zero.
