UEFA ka shpërndarë ditën e sotme familjet të cilat kanë krijuar një mbiemër në futboll, i cili më pas është trashëguar brez pas brezi, duke vazhduar dhe përçuar vlerat dhe traditat e tij.
Kështu në përshkrimin e UEFA-s kur vjen fjalë për në Shqipëri, nuk mund të mos përmendej familja Mema, e cila ka filluar traditën e saj prej viteve 1960 e deri në ditët e sotme ku mbiemri vazhdon të jetë aktiv dhe nga më të rëndësishmit në historinë e futbollit shqiptar. Për fat të keq ditën e djeshme familja Mema humbi një pjesëtar të sajin, Ali Memën, i cili u nda nga jeta pas një sëmundje të rëndë, ndërkohë që Aliu ishte babai i trajnerit aktual të Tiranës, Ardian Memës.
Ndërkohë, ja se si vazhdon përshkrimi i UEFA-s për familjen Mema: “Në vitet 1960 dhe 1970, 3 vëllezërit Mema, Haxhiu, Aliu dhe Osmani ishin pjesë e Tiranës, si futbollistë apo si trajnerë, dhe ky pasion më pas çoi edhe në përhapjen e një tjetër brezi. Gjatë kohës së tij të suksesshme si trajner i Tiranës, në skuadrën e Ali Memës bënte pjesë edhe nipi i tij, Sulejman Mema, që më vonë u bë trajner i skuadrës, teksa në ekip tashmë ishte djali i Aliut, Ardian Mema.
Tirana është në gjakun e familjes, edhe pse Osmani për pak gjatë shërbimit ushtarak luajti për Partizanin. Sulejmani ndërkohë kaloi një periudhë të vështirë kur ishte për pak kohë trajner i Partizanit teksa tregon se të gjithë në familje i kishte kundër,” E kisha të gjithë familjen kundër, xhajat, nipërit, të gjithë përfshirë edhe dy vajzat e mia”, shkruan vipsport. Ky ishte përshkrimi i bërë nga UEFA për një nga mbiemrat që ka një pjesë të rëndësishme në historinë e futbollit shqiptar.
