Të tjera të dhëna kanë dalë në dritë sa i takon vrasjes së shtetasit Jurgen Duka (Mëziri). 29-vjeçari ishte prangosur një vit më parë, dhe pritej të ekstradohej drejt Italisë.
Sipas policisë, Duka ka qënë pjesë e grupit që trafikonin kokainë dhe heroinë nga Amerika e Jugut dhe Evropa Veriore.
29-vjeçari u arrestua një vit më parë, në kuadër të një operacioni anti-drogë mes Shqipërisë dhe Italisë, ku u prangosën edhe disa persona të tjerë. Grupi kriminal i trafikut përbëhej nga shqiptarë dhe italianë. Operacioni në Itali u zhvillua në Marche, Emilia Romagna, Lombardi dhe Liguri. Nuk dihen ende arsyet se si viktima u lirua nga qelia.
Njoftimi i Policisë së Tiranës për ngjarjen:
Me datë 14.12.2021, rreth orës 00:20, në rrugën “Irfan Tomini”, shtetasi J.D. (M)., është konfliktuar me një person ende të paidentifikuar. Personi ende i paidentifikuar ka qëlluar me armë zjarri ku ka mbetur i plagosur shtetasi J. D. (M)., rreth 29 vjeç. Si pasojë e plagëve të marra, shtetasi J. D. (M)., ka ndërruar jetë në Spitalin Universitar të Traumës.
Shërbimet e policisë kanë kaluar menjëherë në vendngjarje, dhe grupi hetimor, nën drejtimin e Prokurorisë ka sekuestruar prova materiale që shërbejnë për të identifikuar autorin e ngjarjes. Janë marrë në pyetje shoku i shtetasit J. D. (M)., dhe persona të tjerë në vendngjarje. Vijon puna për identifikimin e kapjen e autorit.
